خمسة استعبــاط...

يارب يا هادى جيب الاعضاء الناحية دى
عزيزى العضو المبيتلى بدخول هذا الموضوع
واللى متعشم بموضوع متميز اقولك انسى...
ايوة انسى وخد البنسة...
الامر كلة لا يتعدى شوية هلوسات رمى بها كيبوردى يمينا ويسارا
ولم تجد لها مرتعا الا هذا المنتدى
مهو كلو بيستعبط بقا
حكومة بتستعبط وشعب بيستعبط وكمان معارضة بتستعبط
حتى عمنا المتنبى عرف حكاية الاستعباط اللى ماشية فى بلدنا
من زمان اوى وقال اية ...
وكم ذا بمصر من المضحكات.... ولكنة ضحك كالبكاء
وكان المضحكات دى كمان بتستعبط علينا
يعنى تضحك وتبكى فى نفس الوقت طب ازااااااى
متيجو احكيلكو الحكاية...
العبد لله اللى بيستعبط وبيكتب ليكو دلوقتى اسمة محمد
وكانت علاقتة بالنت زى علاقتة باللغة الهندية تمام يعنى يا دوب كيا لية تيكية
بالمناسبة كيالية يعنى ازيك ولا كيف الحال
وتيكية يعنى تمام وفل الفل
المهم كنت يا دوب اعمل تشاتنج مع العيال اصحابى
وكنت ازهق بسرعة لانى بلاقى الخاص بتاعى فى الشات
مليان بنات عايزين يتعرفو( بيستعبط بقا )
شوية كدة وقلت اية اعملى ايميل اكلم علية العيال اصحابى برضة
وفى لحظة لقيت نفسى بحب واحدة زى القمر
وبقيت اكلمها عالايميل ونسيت العيال اصحابى
مش بيقولك الراجل بالف بنت بس ان جت البنت يغوووور ال 0000
المهم يا اخوانا فى لحظة طيش من البت حبيبتى اللى شايفانى
شاعر وكاتب ملوش مثيل
اتهفت فى نافوخها وقالتلى متيجى تسجل فى المنتدى وتكتب هناك
وانا ولا انا هنا وقلت ومالو دنا اخليلك المنتدى دا ناااار ( برضو بيستعبط )
ورجعت قلتلها بس الاقى الوقت يعنى 00000 بيتهرب الاخ
بصراحة قلت هو لما الكل حوالية بيستعبط طيب مستعبطش انا كمان لية
وقلت الاقربون اولى بالاستعباط بما انكم اعضاء معايا هنا استحملونى بقا
وفكرت بقا كدة وانا فى ساعة صفا ( غير ساعة صفاء ابو السعود )
وسرحت بخيالى لبعييييييييييييد اوى ( مهو اسرح لقريب لية لما ممكن ادفع اقل اقصد اسرح بعيد )
واتخيلت بقا يا اخوانا لو كانت ثورتنا دى قامت فى عصر النت دا
مكنش طبعا كل واحد هيضطر انة يستخدم شفرات سرية
وافشخانات من دى عشان يعرف التانى وبقية الجماعة ان معاد الاجتماع
الساعة اربعة وعشرين الا حتة صغيرة اد البسبوسة
ولا هيكونو مضطرين ينزلو الفجرية والديك بيدن كوكو كوكو فى الفجرية
ويروحو المكان المتفق علية وكل واحد يخبط خماشر خبطة ونص على الباب
بالمناسبة خماشر يعنى خمستاشر بس بندلعها(مش بقولكو استعباط)
يقوم يطلعلو واحد ماسك لمبة جاز ويقولو كلمة السر
يقولو السيكو سيكو يقوم يقولو فى التربتيكو ويدخل
ولا انهم فى اجتماعهم يتكلمو بصوت واطى عشان الحيتان ليها ودان
كان كفاية بضغطة على الكيبورد كل شئ يتحدد بالثانية
وبعدين صحانى الاخ بتاع الانابيب بصوتة من ساعة الصفا اللى كنت فيها
وهو بيقول انابيييييييييييييييب
وفكرت هى حكومتنا استعبطت وباعت الغاز بتاعنا لاخوانا اللى ميتسموش
وكمان بتراب الفلوس لية ؟؟
قلت عادى مهو الناس لبعضيها برضو
قوم اية بقا سرحت فى حكومتنا الغالية وبعد كل بلوة تطلع علينا تستعبط
وتجيب العيب فينا احنا الشعب
وكمان عندها حق محنا بنستعبط برضو وساكتين
اصل احنا لازم بقا اية ......
وكمان نقوم ونعمل اية .......
ونتفق بقا اننا اية ........
عشان كدة مينفعش بصراحة اننا ........
اه مهو لازم نتكلم بقا وبصراحة ونقول ...........
لحد امتى هنفضل ...........
هو مين شال كلامى اللى فوق وحط نقط؟؟؟
اسمعو انا مش بخاف خالص
بس الظاهر اخوانا وانا بكتب
شالو الكلام وحطو نقط
بقول اية استنونى فى خمسة استهبال
هو انا كنت بقول اية