حزينة2

رحم الله الدوش رحمة واسعة

ضلمــــــــــت

أقـــول

والشمْسِ في عِزّ الامل

تُهْتَ ومشيتْ

أقول يا نحن يا انتو و

بكيتْ

يا مواعيد

يا صباح من غير وسِم

تُهْتَ ومشيت

ما ضَلّمَتْ

ما بْتَعْرِف الزول البِجِيك

ولا البِجيكَ

بيعْرِفَك

حتى الشبابيك

والزوايا الكان بِتَجْمَع

في حنايا الشكوك



ضلّمتْ

أغْشاكِ يا نفسي الغريبَهْ

من همومي اطلِّعِك

القاكِ واقْفَهْ على الطريق

أحزان بِتفْرح

وتشْتبِك

أفراح بِتحْزَن

وترْتَبِك

لمّنْ رحلتَ مع الغُنا

عِز الأماني و

ضلّمـــــت

مَدّيتْ على الأمل القريب

أشواق كتيرَه و

قَصّرَتْ

في زاويهْ من ضُل الشجون

جابتْ ظُنونا و

قيّلَتْ

كلّمتَ أشجار الخريف

عن شوق نَمَا

في الوحشَهْ والزمن الأسيف

دلّتني اْفتِّش

في المغارِب

والمشارِق

عَن علامات

أو رصيف

ترقُد الأزهار عليهو

يا بنفسج

كُحْلي غالي

وبُتقالي

امشوا انتو

أنا البقِيف

ما ضلّمَـــتْ